مونودراما "مراية" _ تأليف ياسمين إمام (شغف)

المنظر: 

فتاة ترتدي فستانا بنصف كم، وقصير قليلا، تقف  أمام مرآة ما.. قد تكون مرآة افتراضية لا يراها غيرها. 

على مدار النص حتى نهايته، تجرب الفتاة عددا من  قطع الملابس: قد ترتدي ملابس/ تخلعها/ ترتدي غيرها/ أو ترتدي فوقها ملابس أخرى.

* تكرار بعض الجمل والكلمات مقصود، حيث تنتبه البطلة لمشاعر أخرى أو معان أخرى للجمل التي تنطقها، فتغير في طريقة لفظها لها من حالة إلى حالة. 

* عندما تتحدث الفتاة بطريقة شخص آخر، خاصة في البداية، فإنها تفعل ذلك عن قناعة، ولا تقلدهم بطريقة فيها سخرية أو استهزاء. 

الفتاة:

(تجرب كلمة "مبروك" بآداءت متعددة، 

ووضعيات مختلفة أمام المرآة)

"مبروك " ..

 "مبروك".. 

"مبرووك"..

 "مبروك"..

المراية دي صورتها مش حلوة ليه؟

(تمسح المرآة)

مش عارفة هيغيروا المراية دي امتى؟

"مبروك" .. "مبروك"

لأ .. ابتسمي أكتر ..

(تبتسم)

ابتسامة عدلة! يقولوا إيه يعني؟

أييوة كده

مبروك 

 لأ.. مبروك لوحدها ماتنفعش،

ليها .. اممم.. 

"مبروك فستانك يجنن.. روعة" .. 

لأ .. لأ..

" أقرصك في جمعتك وأحصلك في ركبتك"

لأ .. مش كده! 

"مبروك.. ربنا يتمم بخير!"

هي دي! 

طب وهوه؟

"مبروك.. عقبال ولادك"؟

"مبروك.. ربنا يتمم بخير"

تاني! لسه قايلاها!

امممم .. 

"مبروك عرفت تنقي؟ "

مبروك ربنا يتمم بخير.. وبعدين هوه..  مبروك عرفت تنقي..

أييوة كده ... مبروك ربنا يتمم بخير ... مبروك عرفت تنقي..

ياااه أخيرا هتتخطبوا .. كنت مستنية الخبر ده من زمان 

(صوت طرق على الباب )

الفتاة:

(ترفع صوتها)

لسه ما خلصتش لبس.. لما أخلص هطلع..

روحوا المراية اللي ف الأوضة التانية 

(تنظر إلى المرآة وتتفقد شكلها)

ولا يعني أنزل كده؟

الفتاة: 

(تتحدث بطريقة أمها)

انتي اتجننتي تنزلي كده؟!

نسيتي قوام اللي اتكلمنا فيه؟

(الفتاة تتذكر كلام الأم وتردده مقتنعة به لوهلة، وهكذا تفعل مع كل صوت تتذكره، ثم تعود إلى صوتها الشخصي)

الفتاة:

انتي خلاص كبرتي ، ولازم تعدلي من نفسك..

وبكرة هتتأكدي من الكلام ده..

البنت المحترمة هيه اللي تخلي الناس تقدرها وتعاملها كويس..

محترمة؟ ما أنا محترمة!

البنت المحترمة هيه اللي وشها ف الأرض وصوتها واطي مايتسمعش،

ولبسها مغطيها كلها 

الفتاة: 

(تخاطب نفسها بطريقة الشيوخ)

لازم يا اختاه تعرفي إن الحجاب صيانة ليكي

 وهوه اللي بيخليكي غالية..

الفتاة: 

ووقت ما يكون فيه راجل يريد الزواج، تفتكري هياخد مين؟

 اللي حتة باينة من هنا ولا هنا وشعرها باين؟

 ولا المحترمة المحجبة المصونة؟ 

ما هو صحيح.. يعني لما نروح عند الجزار نشتري لحمة.. 

بناخد حتة اللحمة المتعلقة بره وباينة والدبان رايح جاي عليها؟

 ولا حتة اللحمة المتغطية كويس المتشالة في التلاجة؟

حتة لحمة.. حتة لحمة؟! 

حتة شيكولاتة! لو عرضنا على واحد حتتين شيكولاتة..

 واحدة ملفوفة في ورقتها، والتانية مفكوكة وطالعة من ورقتها،

 تفتكري كده هيختار أي واحدة؟

 أكيد مش هيبص للي طالعة من ورقتها.. حتة شيكولاتة!

 (تبتسم) – (تبدأ في الغناء وهي تختار بين عدد من "الطرح"، وترتدي إحداها أمام المرآة)

الفتاة:

(تغني)

"عشان خاطره ياما سمعت الكلام

ومن غير كلام قوام بأعمل اللي يقولي عليه

ما بأزعلش منه أو أزعل معاه وعايشه برضاه

وسايباله نفسي أمانة في إيديه

ولو قالي إيه، ما بأسألش ليه

ما بأقولش أنا تلت التلاتة كام"

الفتاة: 

(بطريقة الأم)

 والبنت المحترمة هيه اللي بس بتلفت نظر الشاب من دول،

 وتخليه ييجي يتقدملها..

(تذهب الفتاة تحضر جاكت تلبسه وتعود للمرآة)

 الهادية.. اللي بتسمع الكلام.. 

عاوزين نفرح بقى..

الفتاة: 

 عاوزين نفرح.. أنا عاوزة أفرح

(صوت فرح وزغاريد من الشارع)

الفتاة: 

بس دي سارة بنت عمي..

الفتاة:

(بصوت الأب)

 هيه صحيح بنت أخوه، 

بس "أخويا وعيلته دماغهم طاقة ومالناش دعوة بيهم"

الفتاة: 

(ترتدي عددا من قطع الملابس فوق ما ترتديه)

سارة دي مالكيش دعوة بيها خالص ولا أسمعك تجيبي سيرتها.. 

همه عشان معاهم قرشين زيادة يقدروا يتحركوا براحتهم شوية ..

 لكن إحنا عارفين حدودنا كويس.. 

ولازم يكون لبسك كويس عشان محدش يضايقك،

صوتك ما يعلاش خصوصا في الشارع..

 اللي يرمي أي كلمة ما ترديش عليه..

 واحنا مش عاوزين مشاكل..  

لا عندنا عربية تقفليها على نفسك زيهم،

 ولا أبوكي بتاع مشاكل.. 

لا عندنا عربية تقفليها على نفسك زيهم، ولا أبوكي بتاع مشاكل.. 

ما شاء الله عليكي .. ماشاء الله

(صوت ابن خالتها):

 ما شاء الله عليكي.. أكيد يوم ما هتجوز،

 هدور على واحدة زيك كده..

الفتاة: 

هادية وبتسمع الكلام.. ومحترمة.. 

ومفيكيش غلطة..

 آآه يا ابن خالتي!  

الفتاة:

(تغني وهي تختار الاكسسوارات وترتديها) 

"وأنا معاه تلميذة ف سنة أولى

بس الغريب أنا مبسوطة كده

وبكون معاه على طول هادية وخجولة

مع إني .. تيرارا رارا

ده أنا بقيت بألبس على كيفه

ما بقولش لأ على حاجة بيعوزها

وبقيت أشوف كل اللي بيشوفه

والتعليمات بالحرف أنفذها

ما هو خلاص سيطر على حياتي "

(صوت ابن خالتها): 

قريبتك دي.. أيوة أيوة.. بنت عمك.. اسمها..

الفتاة: 

سارة.  عنيدة ودماغها ناشفة ومغرورة، ومابيهمهاش حد..

 قال إيه بتعمل الحاجة اللي مقتنعة بيها وشايفاها صح..

 نعم! ما بيهمهاش كلام الناس !!

 ما بيهمهاش كلام الناس.. ما بيهمهاش كلام الناس!

بس أكيد سارة بيضايقوها كتير ف الشارع وبتحصلها مشاكل كتيير..

يمكن طول عمرها.. أنا بس مش عاوزة أقول.. 

لإن أنا بنت محترمة.. البنت المحترمة هيه اللي صوتها واطي..

 البنت المحترمة هيه اللي لبسها طويل ومغطيها.. 

البنت المحترمة هيه اللي تبص في الأرض..

 البنت المحترمة هيه اللي ما تتكلمش.

(صوت مواصلات، والفتاة تتذكر لحظة التحرش بها في المواصلات)

الفتاة:

(تنظر إلى الأرض)

ممكن تبعد شوية لو سمحت.. 

عشان.. عشان.. هقع! 

لو سمحت.. لو سمحت.. 

(تنكمش في نفسها وملابسها وتردد في ترتيل)

 البنت المحترمة هيه اللي صوتها واطي..

 البنت المحترمة هيه اللي لبسها طويل ومغطيها..

 البنت المحترمة هيه اللي تبص في الأرض..

 البنت المحترمة هيه اللي ما تتكلمش 

(صوت زميلتها) :

 إتلم وإلا ورحمة أمي هجرجرك على أقرب قسم..

 علي صوتك كده ياحبيبتي واشخطي فيه.. 

مش هتاخدي حقك ولا هتلاقي حد يحترمك 

إلا لو صوتك عالي.. خصوصا لو بنت..

( الفتاة تنتبه لكونها مازالت في غرفتها، تنظر حولها.. تتنفس..وتقوم)

(صوت زميلتها):

 ابن خالتك؟ يابنتي ماتصدقيش..

 الراجل ما عادش بيعجبه..

الفتاة: 

البنت المقفلة! الراجل ما عادش بيعجبه البنت المقفلة..

(تخلع الطرحة)

لازم تناغشيه وانتي اللي تفتحي معاه كلام.. 

ولازم شكلك يعجبه.. 

(ترتدي جزمة بكعب عالي)

 لو حسيتي إنه بيحب البنت المليانة تتخني شوية..

(صوت ابن الخالة) :

 انتي فعلا محتاجة تتخني شوية.. انتي رفيعة قوي 

الفتاة: 

فعلا محتاجة أتخن شوية!

 ( الفتاة تأكل شيكولاتة)

(صوت ابن الخالة):

 لالالأ .. انتي تخنتي قوي كده ليه ؟

(تضع الفتاة اصبعها في جوفها لتتقيأ ما أكلته)

الفتاة: 

لو اللي ماشي البنت الرفيعة امنعي الأكل والحلويات..

(الفتاة تغني أمام المرآة وهي تحاول عمل تمرينات رياضية / الرقص، لكنها تفشل في ذلك)

الفتاة: 

(تغني)

على فكرة ما قلتليش كلام حلو النهاردة

ما تجيش بقى تيرارارا تيرا رارا وأرضى

من مدة ما جبتليش يا حبيبي إن شا الله وردة

بقيت تشوفني وما تقوليش يا حبيبتي إيه القمر ده

ياسيدي بين أي إهتمام

أصلك إنتا اللي معودني ع الدلع ده وبتهاودني

كلمة حلوة يادوب تسعدني من غيرها حياتي بارده

الفتاة: 

لو شعرك مش حلو تكويه.. البسي باروكة.. تحطي لينسس..

انتي خلاص كبرتي ولازم تعدلي من نفسك

(تمسك الفتاة بمعجون الأسنان – شامبو الشعر – مزيل العرق - نظارة شمس - .. إلخ،

 وتقوم باستعراض أسنانها – شعرها – رائحة إبطها رافعة ذراعها كأنما في مترو- كما الإعلانات مع كل منتج منهم وهي تبتسم أمام المرآة) 

الفتاة:

مع سولجيت ابتسامتك هتسحره

مع الشامبو.. شعرك هيخليه يدخل من باب البيت، ونسمع الزغاريط

حطي blusher بالألوان المناسبة لإخفاء أي شحوب

(تخرج علبة مكياج، وتضع على وجهها، ثم عينيها، وتقلد المذيعات في برامج المرأة) 

الفتاة:

الرجالة بيربطوا بين البشرة المتألقة والصحة النفسية الجيدة.

(الفتاة تنظر في المرآة – تبتسم – ثم تشهق، وتمسح ما وضعته) 

الفتاة:

 هااااا! الناس يقولوا عليكي إيه ؟

(تعيد وضع الماكياج)

الفتاة:

الراجل ماعدش بيعجبه البنت المقفلة

وحطي ماكياج عينيكي بطريقة ساحرة عشان تخليه ينجذب ليكي وتلفتي انتباهه.

ان نظر المرأة إلى عين الرجل يجعلها أكثر جاذبية.

فكيف تلفتين نظر الرجل من أول نظرة؟

(بطريقة الشيخ، وهي تلف قماشا حول رأسها وعينيها) 

الفتاة:

النظرةُ سهمٌ مسموووم من سهامِ إبليييس!

البنت الكويسة هيه اللي بتسمع الكلام

الفتاة:

الراجل ماعدش بيعجبه البنت المقفلة

والبنت الكويسة هيه اللي بتسمع الكلام

(الفتاة تمسك مجلة للموضة في يدها ، وتقرأ) 

الفتاة:

(تقرأ) 

الرجال يحبون رؤية المرأة وهي مرتدية ملابس جميلة باللون الأحمر

(تحضر شيئا أحمر ترتديه فوق ملابسها)

الفتاة:

 (تقرأ) 

استخدمي حزاما عريضا..  

يبحث الرجال دائما عن المرأة التي تستطيع الحمل بصورة طبيعية

 (تحضر حزاما عريضا ضيقا ترتديه) 

البنت الكويسة هيه اللي بتسمع الكلام

(تقرأ)

أثبتت الدراسات أن الرجال ينجذبون إلي النساء التي تتميز درجة أصواتهن بالعلو 

بدرجة طفيفة، لأنه غالبا ما يدل ذلك علي الشباب والصحة الإنجابية.

(تكرر الجملة الأخيرة وهي ترفع من صوتها، كما ترفع من طبقته)

لأنه غالبا ما يدل ذلك علي الشباب والصحة الإنجابية.

(تقرأ)

ايااااكي ايااااااااكي والصوت العالي خليكي دايما بنوتة رقيقة 

وصوتك عامل زي الهمس 

الناس يقولوا عليكي إيه؟

(تخفض صوتها وتهمس) 

خليكي دايما بنوتة رقيقة 

وصوتك عامل زي الهمس 

لان بجد كل الولاد بتتنرفز اوي من الموضوع ده

........

صفات تخيف الرجل وتبعده عن المرأة.. 

(تشهق) 

هااااا...

هناك رجال يهربون من المرأة التي يظهر عليها ثقتها بنفسها

 فهي تنفر الكثير من الرجال..

 والرجل يبحث عن المرأة الضعيفة التي تحتاج  إليه دائماً.

البنت الكويسة هيه اللي بتسمع الكلام

تزداد المرأة جمالاً في عين الرجل عندما يزداد رأسها انخفاضا 

(صوت طرق على الباب)

الفتاة:

إن خروج المرأة من المنزل هو سبب كل فساد على نفسها ومجتمعها  

(صوت طرق على الباب)

الفتاة: 

والبنت الكويسة هيه اللي بتسمع الكلام..

 لما أي واحد.. أي واحد..

 أي واحد ابن حلال جاهز وجاي يتقدملها،

 تحمد ربنا إن حد بصلها وترضى بيه،

 مش تتبطر وتقول أسباب تافهة..

الفتاة:

أما هي.. ترفض ناس.. تقبل ناس.. 

مالناش دعوة بيهم..

 البنت الكويسة هيه اللي تسمع الكلام..

(صوت الفرح من الشارع) - (طرق على الباب)

الفتاة: 

 (تمثل الابتسام)

ابن خالتي رايح جاي مع سارة.. 

ابن خالتي اتقدم لسارة؟ وهيه بتفكر؟! 

اتغير كتير بعد ماعرفها؟ اتغير! هوه اللي اتغير؟ 

خطوبتهم النهارده.. كويس جدا..

"مبروك ياابن خالتي .. ربنا يتمم بخير" ..

 "مبروك ياسارة .. عرفتي تنقي"

مبروك.. شكلي حلو؟ مؤدبة ؟

 محترمة؟ ما بعملش مشاكل؟

 (طرق على الباب) .. (تنظر نحو الباب في غضب وتوعد)

الفتاة: 

على فكرة يا سارة ..

- انتي خلاص كبرتي و لازم تعدلي من نفسك

- ابن خالتي بيحب البنت الهادية المؤدبة اللي بتسمع الكلام

-بسلوجيت ابتسامتك هاتسحره

- الراجل ما عادش بيعجبه البنت المقفلة

- الناس يقولوا عليكي إيه؟

- البنت الكويسة هيه اللي بتسمع الكلام ..

 (طرق أكبر على الباب)

(الفتاة تحاول القيام فتقع)

الفتاة: 

مبروك.. بابتسامة..

 مبرووووك بابتسامة وحماس وقرصة ف الركبة..

 سارة وابن خالتي؟ طب ازاي! 

 (طرق أكثر على الباب، مع تدهور حالتها النفسية وهي تردد "مبروك"، وتخلع كل ما ارتدته جزءا وراء آخر، وتلقي به في عنف)

الفتاة: 

مبروك.. مبروك.. مبروووك .. مبروك 

تمت

تأليف: 

ياسمين إمام (شغف)

****

على الراغبين في تحويل النص إلى عرض مسرحي، التواصل مع الكاتبة أولا: 

shaghafon@gmail.com